पोखरा, चैत्र — पोखरा–लेखनाथ मालपोत कार्यालय बाहिर केही बिचौलियाहरूले सेवाग्राहीबाट मनपरी शुल्क असुल्ने क्रम बढ्दै गएको गुनासो आएको छ। कार्यालय परिसर वरिपरि सक्रिय यस्ता व्यक्तिहरूका कारण सर्वसाधारणले सहज रूपमा सेवा लिन नसकेको बताएका छन्।
सेवाग्राहीहरूका अनुसार लाइन मिच्ने, घण्टौँ कुर्नुपर्ने, र बिचौलियाको सहयोगबिना काम नै नहुने जस्तो वातावरण सिर्जना गरिएको छ। “सिधै कार्यालय जाँदा झन्झट मात्र हुन्छ, बिचौलियामार्फत जाँदा छिटो काम हुन्छ तर अतिरिक्त पैसा तिर्नुपर्छ,” एक सेवाग्राहीले गुनासो गरे।
यस समस्याप्रति गम्भीर ध्यानाकर्षण गराउँदै ‘परिवर्तन नेपाल अभियान’का सदस्यहरू मालपोत कार्यालय पुगेका थिए। उनीहरूले त्यहाँको प्रशासनसँग प्रत्यक्ष छलफल गर्दै सेवाप्रवाहमा देखिएको अव्यवस्था, बिचौलियाको सक्रियता र सेवाग्राहीले भोग्नुपरेको सास्तीबारे जानकारी गराएका थिए।
कार्यालयका प्रशासन अधिकृतले समस्या समाधानका लागि आवश्यक पहल गर्ने र सेवाग्राहीलाई सहज, छिटो तथा पारदर्शी सेवा प्रदान गर्न प्रतिबद्ध रहेको बताएका छन्।
त्यसैगरी, अभियान टोलीले जिल्ला प्रशासन कार्यालयमा औपचारिक रूपमा ज्ञापन पत्र बुझाउँदै नागरिकले सरकारी सेवामा ठगी र हैरानी सहन नपरोस् भन्ने माग राखेको छ। ज्ञापन पत्रमा सेवा प्रणालीलाई पारदर्शी बनाउँदै छिटो र प्रभावकारी सेवा उपलब्ध गराउन तत्काल कदम चाल्न आग्रह गरिएको छ।
अभियानका सदस्यहरूले समस्याको दीर्घकालीन समाधान नभएसम्म निरन्तर आवाज उठाइरहने प्रतिबद्धता समेत जनाएका छन्।
